துளசியின் நன்மைகள் மற்றும் பக்க விளைவுகள்

துளசியின் நன்மைகள்:

ஒவ்வொரு மூலிகைகளும் தனிப்பட்ட குணங்களை தன்னகத்தே கொண்டுள்ளன. அந்த வகையில் துளசியும் பல அரிய பயன்களை நமக்குத் தருகிறது. துளசி கற்பூரமணம் கொண்ட இலைகளையும் கதிராக வளர்ந்த பூங்கொத்துகளையும் உடைய சிறு செடியாகும். புனித துளசி என்றும் அழைக்கப்படும் துளசி, தமிழ் கலாச்சாரத்தில் புனிதமாக மதிக்கப்படும் மூலிகையாகும். துளசி அதன் மருத்துவப் பயன் மற்றும் ஆன்மீக முக்கியத்துவத்திற்கு பெயர் பெற்றது. கோவில்களில் துளசி மாலையாகவும், பெருமாள் கோவில்களில் துளசி நிவேதனம் செய்யவும், தீர்த்தமாகவும் பயன்படுகிறது. தமிழ்நாட்டில் பலர் வீடுகளில் துளசிச் செடியின் புனிதத்தன்மை மற்றும் மருத்துவப்பயன் அறிந்து அதனை வளர்க்கிறார்கள்.

• துளசியின் மணம் சிலவகை நோய்க்கிருமிகளையும் மற்றும் சிலவகை தொற்று நோய்களைத் தடுக்கவும், இதன் நெடி கொசுக்களையும், விஷப்பூச்சிகளை விரட்டவும் பயன்படுகிறது.

• தினமும் காலையில் சிறிதளவு துளசியை மென்று சாப்பிட்டு வந்தால் ஞாபகசக்தி அதிகரிக்கும்.

• துளசியின் அடாப்டோஜென் பண்புகள் மன அழுத்தத்தை நிர்வகிப்பதற்கும் மனநலத்தை மேம்படுத்துவதிலும் முக்கிய பங்கு வகிக்கிறது.

• கண் கட்டிக்கு துளசியின் இலையை கசக்கி அதன் சாற்றை கண் கட்டியின் மேல் பூசிவரக் கட்டி உடைந்து புண் ஆறும்.

• துளசிச்சாறுடன், கரிசாலைச்சாற்றைக் கலந்து காதில் விட்டு வரக் காதுவலி, இரத்தம், சீழ்வடிதல் ஆகியவை குணமாகும்.

• குழந்தைகள் பால் குடிக்காமல் வாந்தி எடுத்தால் 5 துளி துளசி இலை சாற்றோடு தேன் கலந்து கொடுத்தால் வாந்தி நிற்கும்.

• இரவில் ஒரு கப் நீரில் துளசி விதைகளைப் போட்டு காலையில் குடித்து வந்தால் சிறுநீரக சம்பந்தமான கோளாறுகள் நீங்கும்.

• தினமும் மூன்று துளசி இலைகளோடு, மூன்று மிளகு சேர்த்து விழுங்கி வெந்நீர் குடித்துவந்தால் இரத்தம் சுத்தமாகும் மற்றும் நோயெதிர்ப்பு சக்தி அதிகரிக்கும்.
• துளசி இலையுடன் கொஞ்சம் உப்பு சேர்த்து நன்றாகக் கசக்கி பல் வலியுள்ள இடத்தில் வைத்தால் பல்வலி குணமாகும்.

தேள் கொட்டுக்கு

சிறிதளவு துளசி இலையை சுத்தம் செய்து வாயில் போட்டு மென்று விழுங்கினால் தேள் விஷம் உடனே இறங்கும். தேள் கொட்டிய இடத்தில் துளசி இலையை நன்றாக அழுத்தித் தேய்த்து விட்டு சிறிது அனலில் காண்பித்தால் வலி உடனே தீரும்.

சீதளக் காய்ச்சலுக்கு

சிறிதளவு துளசியை 2 கிராம் தோல் நீக்கிய இஞ்சி சேர்த்து அரைத்து 200 மி.லி நீரில் கலந்து 100 மி.லி யாகக் காய்ச்சி தினம் மூன்று வேலை ஒரு முடக்கு குடித்து வந்தால் சீதளக் காய்ச்சல் தீரும்.

ஜலதோஷம் மற்றும் சளி, இருமல் நீங்க

ஒரு பிடியளவு துளசி இலையை சுத்தம் செய்து அதைதட்டி சட்டியில் போட்டு ஒரு ஆழாக்கு தண்ணீர்விட்டு அரை ஆழாக்காக சுண்டவைத்து. அதை பெரியவர்களுக்கு ஒரு அவுன்ஸ், குழந்தைகளுக்கு அரை அவுன்ஸ் கொடுத்துவர ஜலதோஷம், சளி மற்றும் இருமல் தீரும்.

காசநோய், காய்ச்சல் தீர

அரைக் கைப்பிடி அளவு துளசியை அரைத்து அரை லிட்டர் தண்ணீர் கலந்து 200 மி.லி யாகக் காய்ச்சி வடிகட்டி 15 கிராம் கற்கண்டு, 2 டேபிள் ஸ்பூன் தேன் கலந்து தினமும் 4 வேளை ஒரு முடக்கு குடித்துவர காசநோய், காய்ச்சல் தீரும்.

பற்று, படர் தாமரைக்கு

துளசியை எலுமிச்சை சாற்றை விட்டு மை போல அரைத்து வைத்துக் கொண்டு பற்று, படர்தாமரை உள்ள இடைத்தை நன்றாக தேய்த்துக் கழுவிய பின் பற்று, படர் தாமரை மீது இரவில் பூசிவிட்டு காலையிலும், காலையில் பூசிவிட்டு இரவிலும் கழுவிவர விரைவில் குணமாகும்.

மன அழுத்தத்திற்கு

துளசியில் யூஜெனோல், அபிஜெனின் மற்றும் ரோஸ்மரினிக் அமிலம் போன்ற சேர்மங்கள் உள்ளன. இவை கவலை எதிர்ப்பு மற்றும் மன அழுத்த எதிர்ப்பு பண்புகளைக் கொண்டிருப்பதாக நிரூபிக்கப்பட்டுள்ளது. இந்தக் கலவைகள் மூளையில் உள்ள நரம்பியக்க கடத்திகளை சமநிலைப்படுத்த உதவுகின்றன. இதனால் அமைதியான மற்றும் சமநிலையான மனநிலை ஏற்படுகிறது.

தோல் பராமரிப்பிற்கு

ஒரு கைப்பிடி அளவு துளசி இலைகளை மாவாக அரைத்து அதில் ஒரு தேக்கரண்டி தேன் மற்றும் சிறிது மஞ்சள் தூள் சேர்த்து நன்றாக கலந்து முகத்தில் தடவி 15-20 நிமிடங்கள் கழித்து வெதுவெதுப்பான நீரில் கழுவவேண்டும். இதனால் சருமம் ஆழமாக சுத்தப்படும், முகப்பரு குறையும், முகம் பிரகாசமடையும்.

முடி பராமரிப்பிற்கு

ஒரு கைப்பிடி அளவு துளசி இலைகளை மாவாக அரைத்து அதனுடன் தயிர் அல்லது கற்றாழை ஜெல்லுடன் கலக்கவும். இந்தக் கலவையை தலைமுடி மற்றும் உச்சந்தலையில் நன்றாக தடவி 30 நிமிடங்களள் கழித்து தலைக்கு குளிக்கவேண்டும். இதனால் முடியின் மயிர்க்கால்கள் வலுப்படும், முடி வளர்ச்சியை ஊக்குவிக்க உதவும் கூடுதலாக, இதன் ஆண்டிமைக்ரோபியல் பண்புகள் பொடுகை குறைக்கிறது.

துளசியின் வகைகள்:

1. ராம துளசி (பச்சை இலை துளசி)

ராம துளசி, இந்தியாவில் பரவலாக காணப்படும் புனித மூலிகைகளில் ஒன்றாகும். இது துளசி வகைகளில் மிக முக்கியமானதாகும். ராம துளசியின் அடையாளம் அதன் இலைகள் மற்றும் தண்டுகளின் மேற்பரப்பில் இருக்கும் பச்சை நிறம் ஆகும். இதன் இலைகள் மென்மையானது. ராம துளசி மருத்துவ குணங்களில் மிகுந்த மகத்துவம் வாய்ந்தது. இதன் இலைகள், மலர்கள் மற்றும் விதைகள் என அனைத்தும் மருத்துவ குணங்களை கொண்டுள்ளன.

2. கிருஷ்ண துளசி (ஊதா இலை துளசி)

கிருஷ்ண துளசி, துளசியின் ஒரு முக்கியமான மற்றும் ஆழமான வகையாகும். இது அதன் தனித்துவமான ஊதா நிறத்தினால் அடையாளம் காணப்படுகிறது. இந்த வகை துளசிகளின் இலைகள் அடர்த்தியாகவும், தண்டு வலிமையானதாகவும் இருக்கும். கிருஷ்ண துளசியின் இலைகள், இதழ்கள் மற்றும் விதைகள்என மருத்துவ குணங்களால் நிரம்பியுள்ளது.

3. வன துளசி (காட்டு இலை துளசி)

வன துளசி என்பது புனித துளசி(Holy Basil) குடும்பத்தை சேர்ந்த ஒரு முக்கியமான துளசி வகையாகும். இது பொதுவாகக் காட்டுப் பகுதிகளில் காணப்படுகிறது. வன துளசியின் தனித்தன்மை அதன் வலிமையான வாசனை மற்றும் மருத்துவ குணங்கள் ஆகும். மற்ற துளசி வகைகளைப் போலவே இதன் இலைகள், தண்டுகள் மற்றும் விதைகள் அனைத்தும் மருத்துவ குணம் கொண்டவை.

துளசி தேநீர்:

துளசி இலைகளைக் கொண்டு ஒரு இனிமையான தேநீர் தயாரிப்பது மிகவும் எளிது துளசி தேநீர் தயாரிக்க சில புதிய அல்லது உலர்ந்த துளசி இலைகளை 5-10 நிமிடங்கள் தண்ணீரில் கொதிக்க வைத்து வடிகட்டி அதை சூடாக குடிக்கலாம். உணவுக்குப் பிறகு துளசி தேநீரைக் குடிக்கும்போது செரிமானத்திற்கு பயனுள்ளது மற்றும் வயிற்று அசௌகரியத்தை குறைக்கவும் உதவுகிறது.

துளசியின் பக்க விளைவுகள்:

துளசியினால் பல பயன்கள் இருந்தாலும், இதனை பயன்படுத்தும் முன் பக்க விளைவுகளைப் பற்றி தெரிந்து கொள்வது அவசியம்.

துளசி பொதுவாக பாதுகாப்பான மூலிகையாக இருந்தாலும் சிலருக்கு பக்க விளைவுகளை ஏற்படுத்தலாம்.

பொதுவான பக்க விளைவுகளில் சில:

• குமட்டல், வயிற்றுப்போக்கு ஆகியவை அடங்கும். இந்த பக்கவிளைவுகள் பொதுவானவை இவை தானாகவே சரியாகிவிடும்.

• ஒவ்வாமை(Allergic) அறிகுறிகளில் அரிப்பு, சொறி மற்றும் சுவாசிப்பதில் சிரமம் ஆகியவை அடங்கும். இந்த அறிகுறிகளில் ஏதேனும் ஒன்று ஏற்பட்டால் உடனடியாகப் துளசியைப் பயன்படுத்துவதை நிறுத்திவிட்டு மருத்துவ ஆலோசனையைப் பெறவும்.

• துளசி சில மருந்துகளுடன், குறிப்பாக நீரிழிவு மருந்துகளுடன் தொடர்பு கொள்ளலாம். இதனால் இரத்த சர்க்கரை அளவுகளில் குறிப்பிடத்தக்க வீழ்ச்சிக்கு வழிவகுக்கும். நீங்கள் மருந்தை உட்கொண்டால், துளசியைப் பயன்படுத்தும் முன் மருத்துவரை அணுகவும்.

துளசியின் ஊட்டச்சத்து மதிப்புகள்

புனித துளசி ஆரோக்கிய நன்மைகளுக்கு பங்களிக்கும் அத்தியாவசிய ஊட்டச்சத்துக்கள் நிறைந்துள்ளது. தோராயமாக 100 கிராம் துளசி இலைகளில்:

ஊட்டச் சத்துக்கள்

கலோரிகள்: 23 கிலோகலோரி

கார்போஹைட்ரேட்டுகள்: 2.7 கிராம்

புரதம்: 2.5 கிராம்

கொழுப்பு: 0.6 கிராம்

வைட்டமின்கள்

வைட்டமின் ஏ: 5275 IU (தினசரி மதிப்பில் 106%)

வைட்டமின் சி: 18 மிகி (தினசரி மதிப்பில் 30%)

வைட்டமின் கே: 414 mcg (தினசரி மதிப்பில் 518%)

தாதுக்கள்

கால்சியம்: 177 மிகி (தினசரி மதிப்பில் 18%)

இரும்பு: 3.2 மிகி (தினசரி மதிப்பில் 18%)

மெக்னீசியம்: 64 மிகி (தினசரி மதிப்பில் 16%)

ஒருவரின் அன்றாட வாழ்வில் துளசியை பயன்படுத்துவது எளிமையானது மற்றும் மன ஆரோக்கியத்திற்கு மிகவும் பயனுள்ளது. ஒரு தேநீராக உட்கொண்டாலும், துணைப் பொருளாக எடுத்துக் கொண்டாலும் அல்லது நறுமண சிகிச்சையில் பயன்படுத்தப்பட்டாலும், இந்த பல்துறை மூலிகையானது மன அழுத்த நிவாரணம் மற்றும் ஒட்டுமொத்த உடலுக்கு நலத்தை அளிக்கும்.